Risque incendie : la mobilisation et la prévention se poursuivent en Corse-du-Sud
(A redazzioni d'Alta Frequenza) - A mubilisazioni è a privenzioni cuntinueghjani da sradicà u risicu di fochi impurtanti nant'à u dipartimentu di Corsica Suttana dipoi arimani. Stamani (dumenica), u prifettu di Corsica hà adunitu tutti i servizii (furestieri, spinghjifochi, gendarmi, météo France), da fà un puntu nant'à a situazioni. È quissa quì hè sempri difficiuli. Malgradu calchì piccula acquata, a sicchia ferma sempri. U latu à meziornu, andendu da A Sulinzara fin'è Sartè hè particularmenti spostu. Buffulati di ventu à 100 chilometri à l'ora sò privisti è a sicchia hè bè stallata. In casu di partenza di focu, a vitezza di sparghjera pussibuli hè di 3 chilometri à l'ora. Ghjustu appuntu, Patrick Strzoda hà dicisu di mantena u dispusitivu di sarratura di i lochi di muntagna è vii di spassighjati, è a strada dipartimintali 261 di Bavedda, da privena u risicu umanu. Situazioni micca simplici dinò nant'à i zoni d'Iddarata, Piana è di u Rizzanesi. I mezi umani è aerei sò pronti. Un Canadair in più hè ghjuntu in Corsica (4 in tuttu), sò censati dinò 2 Tracker, 3 elicotteri da lampà acqua è un avviò di ricunniscenza. Aldilà di què, a prifettura racumanda u rispettu di i cunsigni pà ùn andà micca inde certi lochi è ni chjama à a rispunsabilisazioni di u publicu. Voli renda umaghju dinò à l'eletti chì si sò resi dispunibuli da metta in ballu issi sfarenti arresti. Un puntu novu sarà fattu à a fini di u dopu meziornu.
Sur le même sujet
