Réunion sur les déchets avec Ségolène Royal : la réaction de François Tatti
(A redazzioni d'Alta Frequenza) - U fondu è l'urghjenza : hè cusì chì hè stata amintata a riunioni ssu luni da mani in a prifittura di Corsica trà a ministra di l'Energia, di l'Ambienti è di u Mari è tutti i parsunalità liati à a prublematica di i rumenzuli. Nant'à u fondu, semi d'accordu : Ségolène Royal hà sustinutu largamenti u pianu d'eliminazioni di i rumenzuli appruntatu da a Cullittività tarrituriali di Corsica ; un impegnu finanziariu di u Statu à 70% hè statu ancu annunziatu. Nant'à l'urghjenza, a ministra hà datu dinò infurmazioni assai impurtanti : i travaghji d'apartura di un fossu novu in Tallone si farani à listessu tempu chì a missa in cunfurmità di l'anzianu centru d'intarru. Ssi travaghji, chì principiarani à partasi di luni chì veni, sarani nant'à a racolta di u gaz metanu, à l'urighjini di i prublemi d'odori di a stallazioni è ben intesu di u ricusu di a pupulazioni. Ségolène Royal sarà d'altrondi à a mità di u mesi di lugliu in Corsica torna pà custatà l'avanzata di ssi travaghji. François Tatti si filiciteghja di l'arrigulamentu assai in furia di a riduzzioni di i prublemi d'odori di u centru d'intarru di Tallone. Quandu ssu prublema quì sarà arrigulatu, u famosu prughjettu di Tallone chì avia infiaratu a prublematica di i rumenzuli sarà purtatu fin'è a fini. Sicondu u presidenti di u SYVADEC, quandu u prublema di Tallone sarà arrigulatu, l'altri centri d'intarru di l'isula duvariani suvità l'andatura pà accittà una crescita di capacità in più, è tuttu què in a perspettiva di un arrigulamentu tutali da quì à trè anni.
Steti à senta à François Tatti.
Sur le même sujet
