Réunion entre les élus de la Corse et le gouvernement le 18 ou le 19 mai à Paris

L’assemblea lla Corsica hè in sissioni dipoi sta mani.

Pà issi dui ghjorna di dibattiti, si trattarà di rumenzuli è trasporti marittimi.
Ma innanzi d’entra ci, u prisidenti di l’esecutivu hà fattu un discorsu di pulitica ginirali.

Gilles Simeoni hà parlatu di l’alizzioni prisidinziali francesi, è hà annunciatu chì u scontru trà a riprisintazioni pulitica corsa è u guvernu francesu si farà u 18 è u 19 di maghju.

Parlendu di l’alizzioni prisidinziali, è d’issu votu beddu altu in Cosica pà marine le pen, u prisidenti Simeoni hà dittu ch’iddu rigritaia issi risultata paradussali è cuntradittorii, à contrasensu di l’idea naziunali corsa, ma chì pudariani ancu essa « u fruttu amaru è avvilanatu di a pulitica d’issi cinqui anni llu statu francesu in Corsica ».
Steti lu à senta.

Parlendu di u scontru di parigi, Gilles Simeoni hà dittu ch’issi cinqui anni, u guvernu d’emmanuel macron avia offesu a Corsica, u so populu è a so tarra. Po’ hà dinunciatu u scandalu di statu, quiddu di l’assassiniu d’Yvan Colonna.

Ma, hà dittu u prisidenti di l’esecutivu, « saremu quì à truvà ci cù a storia », senza timori è senza limiti capu nanzi.
Steti à senta à Gilles Simeoni.

I gruppi pulitichi ani riagitu à l’intarventu di Gilles Simeoni.
Pà Jean-Martin Mondoloni, a maiurità tarrituriali ùn hè stata chjara pà l’alizzioni prisidinziali.
In quant’à a « cuddata in parigi » di l’eletti, u gruppu « Un Soffiu Novu » vurria ch’idda ci sichi un’unità in a dimarchja, o ghjunghja ni à « un minimu cumunu » pà issu cartulari corsu, da prisintà lu à u guvernu francesu.
Steti lu à senta.

Saveriu Luciani hà dinunciatu l’appuntamenti faltati cù parigi.
Iss’appuntamenti faltati ani custatu a so vita à un omu, chì quissu pudia essa statu salvu s’iddu fussi statu rispitattu u votu unanimu di l’assemblea corsa pà l’avvicinera lli prighjuneri.

L’elettu di u gruppu Avanzemu hà dittu ch’iddu vurria veda una Corsica unita par cuddà in parigi.

« Ùn ci ni devi essa rinunciamentu, ch’issu populu hè chivi par asista è essa, da culandi bè à u 2022 è à i cunfini lla piazza Beauveau.
A nuzioni di Populu, a nuzioni di co-ufficialità pà a lingua ùn sò à niguzià. Ci voli à entra in un tempu chì sichi quiddi lla ricunniscenza di un populu è di una nazioni in u Maritarraniu »

Steti lu à senta.

Josepha Giacometti hè turrata à parlà di l’alizzioni prisidinziali. Dì chì quiddi chì ani vutatu pà i naziunalisti corsi à i tarrituriali sò i stessi chè quiddi chì ani vutatu à le pen pà i prisidinziali hè bucia, hà dittu l’eletta di Corsica Libara.

In quantu à u scontru cù darmanin, hà dittu chì s’iddi ci sò da una parti i limiti à ùn francà, ci sò da quidd’altra fundamintali pulitichi ch’ùn si poni niguzià. Dici tandu ch’idda andarà in parigi cù a vulintà di u dialugu, ma cù a vulintà bedda ferma ch’ùn laca piazza à rinunciamenti.
Steti la à senta.

Paul-Félix Benedetti, infini, leghji à modu soiu i risultata di marine le pen in Corsica :  u passaghju si hè fattu via i 26 % di fillon in u 2017, chì sò calati à 6 % cù pécresse in u 2022 », dici l’elettu è capifila di Cori in Fronti.

In quantu à u scontru cù u guvernu francesu, ci vurrà ch’iddu piddi in contu a diminisioni pulitica, sucitali è umana d’un populu ch’hè in rumpitura cù parigi.
Steti à senta à Paul-Félix Benedetti.