Reprise de la SNCM : le groupe Stef se positionne

(A redazzioni d'Alta Frequenza) - Dopu a dicisioni di u tribunali di cummerciu di Marseghja arimani, chì hà righjittatu l'ufferti di i trè candidati à a ripresa di a SNCM, tuttu u mondu aspittava una pusizioni franca è chjara di u gruppu Stef, pruprietariu com'è tuttu u mondu a sà di a CMN. Fù fattu oghji duranti una cunfarenza di stampa audio, induva a stampa ecunomica, spicializata è lucali hà pruvatu à scioglia un affari propiu cumplicatu. Dimula subbitu, ùn hè micca oghji chì a Stef hà prisintatu un pianu di sviluppu, un business plan com'ellu si dici oghji, custruitu è assestatu. Parechji pussibilità sò stati studiati malgradu tuttu è s'hè pussutu pinsà à ciò ch'ellu pudaria essa u futuru dilegatariu di u serviziu publicu. Stef l'hà dittu cù forza : a so filiali La Méridionale sarà u puntellu di u novu dispusitivu. Hà dittu dinò ch'ella t'hà solu una cunfidenza propiu rilativa in i trè candidati chì sò scati scartati da u tribunali di cummerciu di Marseghja. U so business plan privedi bè a spiccanza di u trafficu Corsica è Maghreb grazia à dui intrapresi bè sfarenti. Ùn hà micca prisintatu oghji u nomu di u futuru uparatori marittimu, u famosu è iputeticu armatori à quali ella sarà liata; ma duranti ssa cunfarenza di stampa erani prisenti parsunalità ghjunti da u mondu marittimu, a CGM eppo a SNCM è dinò assai vicini da u settori di i trasporti stradali. Eric Giuily in fatti, hè statu prisintatu da Francis Le Mor com'è u pilotu di u novu dispusitivu di trasporti marittimi. Dopu essa passatu pà una mansa di sucità naziunali maiò, hà direttu par asempiu a SNCM è a sucità Causse Wallon, un grandi traspurtadori stradali, paria impurtanti di pricisalla. A Stef ùn hà fattu cunnoscia oghji nè u muntami finali ritinutu, nè u numaru d'impieghi chì sarani salvi da a ripresa di a SNCM, nè mancu l'ingaghjamentu finanziariu ch'ella ci cunsacrarà.

Steti à senta à Eric Giuily, u novu omu forti di a Stef in materia marittima, in cunclusioni di una cunfarenza di stampa di guasgi dui ori.