Rencontre avec Jacqueline Gourault : satisfaction de Jean-Charles Orsucci
(A redazzioni d'Alta Frequenza) - A Corsica t'avarà bè dirittu à un articulu specificu inde a Custituzioni. Hè l'infurmazioni maiò dopu a riunioni di ssu marti in prifittura d'Aiacciu trà a ministra Jacqueline Gourault è l'eletti corsi. S'è ssa rivindicazioni vechja, chì avia inghjinnatu u 27 di sittembri di u 2013 un votu à 46 voti contr'à 51 à l'Assemblea di Corsica, hè suddisfata oghij, è chì u principiu di l'abilitazioni casu à casu ùn viaghja micca à parè di tutti, u cuntinutu di ssu famosu articulu ùn hè ancu difinitu d'una manera esatta. In tutti i casi, a ministra pà u ministru di l'Internu ùn hà ancu fattu cunoscia a pusizioni pricisa di u guvernu è di u Presidenti di a Republica nant'à u sughjettu. Pà Jean Charles Orsucci, s'ellu ci voli ad aspittà a fini di u prucedimentu par dà un avisu difinitivu, a suddisfazioni hè prisenti quantunqua. Pà u capimachja di u gruppu Andà per Dumane-La République en Marche di l'Assemblea di Corsica, a ministra Gourault hà mustratu una via pricisa è rialista, cù a nicissità frà altru pà ssa riforma d'aduniscia i trè cinquesimi di u Cungressu, in currispundenza tutali senza surpresa cù u discorsu d'Emmanuel Macron in Bastia à u principiu di u mesi.
Steti à senta à Jean Charles Orsucci.
Sur le même sujet
