Redécoupage cantonal 2A: le débat est ailleurs pour Jean-Christophe Angelini
(A redazzioni d'Alta Frequenza) - U prifettu di Corsica prisintava oghji (luni) davanti à u cunsighju ghjinirali di Corsica Suttana, duva parechji eletti municipali erini prisenti, u prughjettu di revisioni di a carta cantunali. U dicretu d'appiecazioni di quissu quì sarà missu in anda à l'uccasioni di u prossimu rinnovu di i cunsighji ghjinirali. À partasi di ssa data, ci duvariani essa 11 cantoni. U ducumentu s'arremba à un novu equilibriu demugraficu, ciò chì ùn piaci micca à l'eletti, ci vultaremi. Ind'u so spostu, Christophe Mirmand hà stimatu chì in Corsica Suttana, u scartu trà a pupulazioni di u cantonu u menu pupulatu (Zicavu) è u più pupulatu (6u d'Aiacciu) era d'1 pà 17,39. Cù ssa nova urganisazioni, stima u raprisintanti di u Statu, sarà oramai solu d'1 pà 2,09. Sempri sicondu u ducumentu, u prughjettu si custruisci nant'à a presa in contu di a carta di cuuperazioni intercumunali, nant'à a carta cantunali è nant'à quilla di l'aghji di vita di l'INSEE. Com'è l'emi dighjà ditta, eletti municipali è dipartimintali sò pà a maiò parti upposti à ssa nova urganisazioni. U presidenti di u cunsighju ghjinirali suttanacciu, u prima, hà criticatu u metudu chì hà missu piuttostu in avanti a logica matematica à qualsiasi forma d'appiecazioni. Risicu puliticu, ecunomicu è suciali, risicu di fà crescia a sclusioni ma dinò è soprattuttu assenza di cuncertazioni, reguli d'urganisazioni arbitrarii è incuerenzi di i scritturi geugrafichi di u prughjettu ani fattu parti di i critichi numarosi ammintati da u presidenti pumuntincu. U cunsighju ghjinirali, chì duvaria vutà d'altrondi duranti a sirata, una deliberazioni chì s'upponi à ssu mudellu. Pà ciò chì tocca u cantonu di Purtivechju, chì sarà taghjatu oramai in dui, Ghjuvan Cristofanu Angelini stima chì u dibattitu hè altrò. Ancu s'è u cunsighjeru ghjinirali di u rughjoni hè contr'à ssa nova urganisazioni, stima chì l'avvena di a Corsica si devi leghja ind'u futuru PADDUC, chì sarà dibattutu ssu ghjovi à l'Assemblea di Corsica.
Steti à senta à Ghjuvan Cristofanu Angelini.
