Rapprochement imminent pour Nicolas Battini et Stéphane Tomasini en Corse
(A redazzioni d'Alta Frequenza) - U Ministeru di a Ghjustizia hà annunziatu "ch'ellu voli fà dirittu da quì à calchì ghjornu à a dumanda d'avvicinamentu di Niculaiu Battini è di Stefanu Tomasini". Ss'annunziu ufficiali ghjunghji da un cumunicatu cumunu di i presidenti Gilles Simeoni è Ghjuvan Guidu Talamoni. Ss'ultimi dicini "accoglia cù suddisfazioni ssa dicisioni, chì faci seguita à una mubilisazioni larga, par asempiu di tutta a ghjuventù corsa, mubilisazioni ch'è no salutemi è ch'è no sustinimi". "Da un'antra banda, aviami sottulineatu a necessità è l'urghjenza di ss'avvicinamentu in una lettara mandata arimani à u Prima Ministru Manuel Valls. Aldilà di ss'avanzata, dimu torna chì a presa in contu da u Statu di a quistioni di i prighjuneri pulitichi, di u so avvicinamentu, è di l'annistia hè una cumpunenti essenziali di a suluzioni pulitica à custruiscia è à metta in opara trà a Corsica è u Statu. U so trattamentu hè l'elementu logicu è indispinsevuli di a logica d'appaciata irriversibuli missa in opara inde l'isula, logica d'appaciata chì tutti i parti t'ani u duveri di rinfurzà è d'arradicà di manera difinitiva. Hè pà ssi scopi ch'è no cuntinuaremi, pà contu nostru, à travaghjà cù ditarminazioni", compiini i presidenti di l'Esecutivu è di l'Assemblea di Corsica.
Sur le même sujet
