Projet de multiplex cinéma à Bastia : la mise au point musclée de Pierre-Noël Luiggi
(A ridazzioni d'Alta Frequenza) - U cunsigliu cumunitariu lla cumunità d’agglumirazioni di Bastia si hè infiaratu ghjovi : u primu aghjuntu à u merri di Furiani, sustinutu da parichji eletti cumunitarii, si hè arrabbiatu contru à Pierre-Noël Luiggi, u prisidenti dimissiunariu lla SEM Bastia Aménagement. À senta à Louis Pozzo di Borgo, Pierre Noël Luiggi avaria cunvalidatu, à nomu di a SEM, un prughjettu di sinemà à parichji sali in a ZAE d’Erbaghjolu. U prughjettu, saria quiddu di Daniel Benedittini, u prupiitariu llu sinemà Le Régent in Bastia. U pinseri hè chì issu prughjettu ùn hè statu cuntrullatu da u scagnu lla CAB. À Pierre-Noel Luiggi, li si rimpruvarighja dunqua d’avè lu validatu senza parlà ni à nimu. Presi da issu cumbugliu, François Tatti è Pierre Savelli si sò ingagiati à dumandà ch’iddu sichi ritiratu issu prughjettu marti, mentri a so prisintazioni davanti à a CDAC. Ùn sò rimissi in causa a qualità o a nicissità llu prughjettu, ma solu a manera di fà di Pierre-Noël Luiggi. Da quidd’altra parti, Daniel Benedittini, chì porta u prughjettu, ùn si hè vulsutu sprima innanzi à marti. Pierre-Noël Luiggi, inveci, criticatu chì sò aghjà parichji sittimani, hè à veru in furia. U prisidenti dimissiunariu lla SEM Bastia Aménagement parla di cumbricculi di puliticanti è d’incumpitenza. Dici Pierre-Noël Luiggi ch’iddu hè sustinutu è bè da u Prisidenti di l’esecutivu di Corsica è da u merri di Bastia. Eppuri, Pierre Savelli si hè ingagiatu à dumandà ch’iddu sichi ritiratu issu prughjettu.
Stemu à senta à Pierre-Noël Luiggi
