Procès des gîtes : trois ans ferme requis contre Paul Giacobbi

(A redazzioni d'Alta Frequenza) - Ssu marti da mani, u ministeru publicu, raprisintatu da u prucuratori di a Republica di Bastia, Nicolas Bessone, hà cuntinuatu à sviluppà i so dumandi cuncintrendusi stavolta nant'à l'amministrativi è l'eletti. U prucuratori, chì hà amintatu suvvenzioni "micca quì pà prumova un turisimu intellighjenti ma pà annacquà i clienti", hà dumandatu prima contr'à i secretarii amministrativi, chì d'appressu à ellu "ani missu i so pedi in ssu sistema di frauda senza avecci malgradu tuttu qualsiasi intaressu" ma chì ani "ricunnisciutu ch'elli ùn ghjuvavani à nulla", un annu di prighjoni attimpatu, mentri chì diciottu mesi attimpati sò stati dumandati contr'à a capiserviziu. Eppo, contr'à u cuntrollori Jean Hyacinthe Vinciguerra, chì pà u prucuratori hè "l'autori di falsi cuntrolli, malignu fendu parti da u prima chjerchju", quissu quì hà dumandatu trè anni di prighjoni frà i quali diciottu mesi attimpati è interdizzioni d'avè un mistieru di funzioni publica mentri cinqui anni. Cuncirnendu Jacques Costa è Pierre Marie Mancini, eletti di a cumissioni di u mondu rurali, quissu quì hà dumandatu un annu di prighjoni attimpatu è un annu senza pudè essa elettu contr'à u prima, è trè anni di prighjoni cù diciottu mesi attimpati, trè anni di missa à a prova, 45 000 auri d'amenda è cinqui anni senza pudè essa elettu pà u sicondu. Pà u DGS di l'epica, Thierry Gamba Martini, chì sicondu u prucuratori hè elegibili "à u minimu par avè sviatu soldi publichi par incuria", dui anni di prighjoni attimpati sò stati dumandati, accumpagnati d'interdizzioni d'eserciziu di qualsiasi funzioni publica duranti trè anni. Infini, u presidenti di u Cunsighju Generali di Corsica Suprana à l'epica di i fatti, Paul Giacobbi, in cima à ssu sistema clientelistu sicondu u prucuratori, "grandu urdunatori à u so benefiziu sclusivu" chì ùn hà micca sceltu di piantà ssu prucedimentu, hà vistu dumandatu contr'à ellu trè anni di prighjoni, 100 000 auri d'amenda è cinqui anni senza pudè essa elettu.

Steti à senta à Jean Louis Seatelli, l'avucatu di Paul Giacobbi.