Procès des gîtes ruraux : le jugement
(A redazzioni d'Alta Frequenza) - Hè stata cumunicata ssu marcuri a sintenza in u prucessu di l'affari di l'alloghji campagnoli. Paul Giacobbi, presidenti di u Cunsighju Generali di Corsica Suprana à l'epica, hè statu cundannatu à 3 anni di prighjoni, 100 000 auri d'amenda è cinqui anni senza pudè essa elettu pà arrubecciu di soldi publichi. Una cundanna chì và in u sensu di i dumandi di a pricura. U direttori generali di i servizi di l'epica, Thierry Gamba Martini, hè statu cundannatu pà contu soiu à 2 anni di prighjoni attimpati è 10 000 auri d'amenda. Cuncirnendu l'eletti, Pierre Marie Mancini hè statu cundannatu à 3 anni di prighjoni frà i quali 2 attimpati, 12 000 auri d'amenda è 5 anni d'inelighjibilità pà cumplicità è presa micca legali d'intaressi, mentri chì Jacques Costa hè statu assoltu. U cuntrullori Jean Hyacinthe Vinciguerra hè statu cundannatu pà contu soiu à 2 anni di prighjoni frà i quali unu attimpatu, 8 000 auri d'amenda è 5 anni d'interdizzioni d'eserciziu di qualsiasi funzioni publica pà arrubecciu di soldi publichi. I quadri amministrativi sò stati cundannati trà sei mesi è un annu di prighjoni attimpati, mentri chì ind'è i benefiziari, i cundanni sò trà quattru mesi è trè anni di prighjoni attimpati, accumpagnati d'amendi trà 2 000 è 10 000 auri è di u rimbursamentu di ssi soldi chì ùn duviani micca essa tocchi.
