Procès Bastia - Lyon : les réquisitions du procureur
(A redazzioni d'Alta Frequenza) - Sicondu ghjornu di u prucessu di l'incidenti di a partita Bastia-Liò, cù i dumandi di u prucuratori di a Republica di Bastia, Nicolas Bessone. Cuncirnendu l'ondeci parsoni chì sò intruti nant'à u tarrenu senza fà viulenzi, trà dui è quattru mesi di prighjoni attimpati, o sei mesi di prighjoni chì poni essa cunvertiti in travaghji d'intaressu generali sicondu u passatu ghjudiziariu di i parsoni cuncirnati sò stati dumandati, accumpagnati da dui anni è mezu à cinqui anni d'interdizzioni di stadiu. Cuncirnendu i trè sustenidori suspittati d'avè fattu viulenzi, quattru mesi di prighjoni attimpati contr'à unu, mentri chì dui mesi di prighjoni è un antru mesi par avè ricusatu un prilevamentu cù mantenimentu in prighjoni sò stati dumandati contr'à un antru, è sei mesi di prighjoni cù mantenimentu in prighjoni dumandati contr'à un terzu omu, cundanni accumpagnati da cinqui anni d'interdizzioni di stadiu. Cuncirnendu u steward incausatu, u ministeru publicu hà dumandatu 4 mesi di prighjoni attimpati, 5 anni d'interdizzioni di stadiu è un'interdizzioni difinitiva di fà un mistieri in leia cù a securità contr'à ellu. Infini, u prucuratori di a Republica hà dumandatu trè mesi di prighjoni attimpati, 500 auri d'amenda è cinqui anni d'interdizzioni di stadiu è di tutti l'attività in u SC Bastia contr'à Anthony Agostini, direttori di i sirvizi generali di u SC Bastia, chì, sicondu u prucuratori, hà "fattu nascia u disastru" dopu u prima tempu di a partita.
Steti à senta à Marc Antoine Luca, l'avucatu di dui privenuti.
Sur le même sujet
