Précarité énergétique en Corse : ORELI arrive
(A redazzioni d'Alta Frequenza) - ORELI, ùn hè micca un billissimu nomu ma un prugramma assai cumplessu è impurtanti pà a migliurazioni di l'alloghju. Si tratta in fatti di un arnesi pà a rinnuvazioni energetica di l'alloghju individuali chì adunisci una mansa d'intarvinanti, ciò chì parmetti di tuccà parechij prublematichi. A migliurazioni energetica di un alloghju, aldilà di u prublema energeticu è ambientali stessu, devi parmetta di sguassà i difficultà suciali liati à a spesa energetica, vali à dì dà a pussibilità à i parsoni chì ùn ani micca i mezi oghji di scaldà di una manera curretta u so alloghju. I cunsiquenzi nant'à u pianu ecunomicu sò assai impurtanti, parchì cuncerna ben intesu l'impegnu di u settori di a custruzzioni è di i travaghji eppo a furmazioni di i parsunali. ORELI parmittarà à tutti i parsoni chì bramani di migliurà a parfurmenza energetica di u so alloghju d'avè aiuti finanziari pudendu cullà fin'è 10 000 auri, è in più di què, ss'aiutu quì si pudarà cumulà cù l'aiuti naziunali è lucali chì asistini. I travaghji di migliurazioni di l'isulazioni di l'alloghji sarani fatti da intapresi è artisgiani certificati, dopu à un studiu cumplettu è gratisi rializatu da inginiori termichi. A prima parti di ss'uparazioni à longu andà durarà trè anni è purtarà nant'à 200 alloghji piloti. Dopu, u scopu hè di pudè rinnuvà più di 3 000 alloghji à l'annu, da quì à u 2050.
Steti à senta à Fabienne Giovannini, a presidenti di l'Agenza d'accunciamentu durevuli, di pianificazioni è d'urbanisimu di a Corsica.
