PPI transport : chacun pour soi ?
(A redazzioni d'Alta Frequenza) - L'Assemblea di Corsica hà asaminatu ssu ghjovi un cartulari pisivu è difficiuli, quillu nant'à u Pianu Pluriannuali d'Investimentu di l'Infrastrutturi di Trasportu. S'hè parlatu dunqua di l'avvena è di l'evuluzioni di tutti ss'infrastrutturi, i porti, l'aeruporti, i stradi tarrituriali, o ancu dipartimintali, u caminu di farru, è a lista pudaria essa più longa. Senza entra di manera furmali inde u cartulari, si pò dì ch'ella c'hè stata un'ombra sopra u dibattitu. Un'ombra chì si priciseghja è chì s'avvicina : a nascita d'una cullittività unica. Ci voli à pricisà chì ssu prugramma di guasgi un milliardu è trè centu millioni d'auri si stindarà nant'à deci anni; sarà dunqua gistitu pà a maiò parti da a famosa cullittività unica. Appena à l'usu d'un cunsighju dipartimintali più putenti, ogni cunsighjeru tarrituriali, di tal cumuna maiò o cumunità di cumuni, o rughjonu, hà vulsutu difenda cù forza u so cartulari. S'hè parlatu dunqua di u portu di a Carbonita, di a penetranti d'Aiacciu, di i porti di Purtivechju è Prupià, di a travirsata d'Ulmetu, è torna quì a lista ùn hè micca cumpletta. A nascita di a cullittività unica hà da assicurà ssu gennaru di funziunamentu di un'istituzioni chì hè par difinizioni tarrituriali ? Emi postu a dumanda prima à Marie Antoinette Santoni Brunelli, chì hà difesu assai u cartulari d'Aiacciu.
Eccu a risposta di a cunsighjera tarrituriali di u gruppu Le Rassemblement.
Sur le même sujet
