Pollution atmosphérique dans la région d'Ajaccio : de nouvelles mesures prises par le préfet
(A redazzioni d'Alta Frequenza) - In cumplementu di u missaghju d’alerta diffusatu arimani (dumenica), è di pettu à i cuncintrazioni in particuli fini inediti ind’u rughjoni aiaccinu, u Prifettu di Corsica hà presu un arrestu pà pudè riducia l’emissioni di particuli fini liati à l’attività umana inde l’aria. In fatti, mentri chì u nivellu d’elementi fini inde l’aria hè di regula trà 20 à 30 µg/m3, i gradi arrighjistrati arimani in principiu di dopu meziornu erani di 600 µg/m3, vali à dì un valori chì ùn hè mai statu custatatu pà ssi lochi aiaccini fin’è oghji. Ssu fenomenu, soprattuttu d’urighjini naturali, ùn devi micca crescia cù l’attività umani, par asempiu par via di a ripresa di l’attività à partasi d’oghji. Misuri novi di suspensioni o di riduzzioni d’attività sò stati diffusati dunqua : a vitezza a più alta chì hè autorizata hè di 70 chilometri à l’ora è di 90 chilometri à l’ora annant’à i stradi induv’ella hè limitata di regula à 90 chilometri à l’ora è 110 chilometri à l’ora ; hè difesu di brusgià vegetali fora ; tutti i travaghji d’intrattenu fora, inde u ghjardinu par asempiu, sò pruibiti quandu ssi travaghji mettini in opara mutori termichi ; a cunsumazioni elettrica devi essa ridutta à u nicissariu è micca di più ; hè pruibitu di scaldassi cù u sciaminè o cù scaldatoghji chì viaghjani cù un gruppu elettrogenu. Pà incuragiscia l’utilisazioni di i mezi di trasporti cullittivi, a Cumunità d’agglumerazioni di u paesi aiaccinu hà presu a dicisioni d’assicurà a gratuità di i trasporti di i TCA fin’è a fini di ss’episodiu. À u nivellu industriali, u funziunamentu di a cintrali di pruduzzioni elettrica di u Vaziu devi essa ridutta à u minimu nicissariu pà i bisogni elettrichi, i cantieri chì poni inghjinnà a polvara devini essa suspesi.
