Point sur les incendies en Haute-Corse
Photo @SIS2B Cismonte
I spinghjifoca di u Cismonti ani fattu ghjovi à sera u puntu di i foca chì currini in u dipartimentu. Gramazia à u impegnu ottimu di tutti l’attori lla sicurità civili, si n’hè ghjuntu à una ghjurnata di stabilisazioni. In E Lupertacce, 280 ettari sò partiti in fumu.
« Fermani uni pochi di fucarili accesi sempri, à nantu à a stesa di u cantieri. U tempu hè sfavurevuli par avali, ben’ch’iddu ùn ci ni sichi vintulionu, cù un’umidità à 20 % è i timpiraturi chì francani i 36 grada.
Issu cantieri hè sempri trattatu par tutta a so stesa.
Ci hè stata una ripresa à a punta llu focu, chì hè cursu par cinqui ettari è chì hà ublicatu à mudificà u dispusitivu in tarra.
Longu à a ghjurnata, sò intarvinuti à tempu i mezi aerei è tarrestri, 170 parsoni issendu aiutati à quandu da i Canadair, à quandu da l’elicottari maiori bumbardieri d’acqua », dicia u SIS2B arisera.
I mezi sò stati mantinuti a notti scursa, da cuntinuvà l’azzioni di criazioni di vii, è di spinti di taddi accissibili cù l’aiutu di stabilimentu di gran’lunghezza, ma ancu cù l’aiutu di focu tatticu pà i loca pochi pratichi à ghjunghja ci.
In Corti, sò picciati cinquanta ettari. À liveddu di a Restonica, hè sempri attivu u focu malgradu u travaddu di i mezi aerei è di l’aienti in tarra
Circa uttanta spinghjifoca, militari di a sicurità civili è cura furesta sò stati mubilizati. U staccamentu d’intarvinzioni elipurtatu naziunali di a Sicurità Civili hà ingagiatu i so parsunala è missu in anda unu stabilimentu di gran’lunghezza. Par avali, tutti i parsunala sò impignati sempri, circhendu à tena in tutta a so stesa u cantieri.
A prugrissioni hè bedda dilicata, parvia di i loca pricipitosi è di l’inaccissibilità di certi punti caldi, chì ùn poni essa trattati chè lampendu ci l’acqua cù i mezi aerei. Issi loca sò pochi pratichi à ghjunghja ci, è cuntena o spinghja u focu hè una vera sfida pà l’omini in tarra.
Issi dui cantieri, ci hà da vulè à travaddà li è à cunsulidà li, innanzi ch’idda ùn venga à pighjurà, com’idda hè privista, a meteò. Issendu privista una mubilisazioni cunsiquenti di mezi pà issi dui cantieri, u SIS2B appronta un dispusitivu privintivu cumplimintariu pà a duminicata.
Tutta a parti miridiunali hà da essa tocca ancu idda da issu risicu di foca in furesta.
