Plusieurs incendies en Haute-Corse
(A redazzioni d'Alta Frequenza) - Parechji fochi si sò dichjarati stamani (marti) in Corsica Suprana, duva c'hè un ventu forti. U più impurtanti hè partutu versu 7 ori è 45 ind'u locu dittu Gattone ind'A Ghisunaccia; una trentina d'ettari saria dighjà stata distrutta da i fiari. Dui hangars agriculi à u minimu ani brusgiatu dinò, mentri chì un antru di l'Uffiziu Idrolicu è certi casi sò stati minacciati. Una sissantina d'omi è Canadair agiscini sopralocu, aspittendu a ghjunta di un gruppu d'intarvinzioni di spignifochi è di dui altri Canadair di Corsica Suttana, cù un elicotteru in più di què. In Oletta, à 7 ori è 47, u focu hè partutu vicinu à l'anziana caserna, brusgiendu 5 ettari di vegetazioni. Mezi umani numarosi, un elicotteru è dui Tracker sò mubilizati. Infini in San Fiurenzu, sempri à u listessu mumentu, una superficia di 6 ettari saria stata parcorsa da i fiari, à u nivellu di u Ponti di Farru. Una quarantina di parsoni hè mublizata, militari è pumpieri com'è pà i dui altri fochi, cù inde l'aria dui Tracker è un elicotteru.
Sur le même sujet
