Pauvreté en Corse : l'état des lieux
(A redazzioni d'Alta Frequenza) - U Statu è a Cullittività di Corsica ani urganizatu ssu marti a ghjurnata regiunali di u pianu di lotta contr'à a puvartà è pà l'inclusioni suciali! Ssa ghjurnata t'avia pà scopu di sinsibulizà tutti i partinari istituziunali è assuciativi à a nicissità di travaghjà in cumunu pà riducia a puvartà in Corsica. Quandu si sà chì un corsu nant'à cinqui campa cù menu di 970 auri pà mesi, ci pudemi renda contu di l'urghjenza di l'azzioni è chì ci voli à crià più cà mai una sinergia vera trà tutti l'intarvinanti. A Cullittività di Corsica, chì t'avarà da quì à calchì mesi cumpitenzi più impurtanti in materia suciali, hà dicisu, u 30 di sittembri scorsu, di fà di a lotta contr'à a precarità una priurità pulitica. Ramintemi chì dipoi u 2015, u Statu hà missu in ballu un pianu pluriannuali di lotta contr'à a puvartà è pà l'inclusioni suciali in Corsica. U fogliu di strada 2015-2017 n'hè oghji à a mità di u parcorsu è ssa ghjurnata hà dunqua parmissu di fà una valutazioni di l'azzioni. U prifettu di Corsica l'hà ramintata ssu marti da mani, u fattu d'ùn dumandà micca l'accessu à i so diritti ferma un prublema maiò, parchì a puvartà è a precarità ùn parmettini micca, troppu suventi, di ghjunghja fin'è tutti i dispusitivi d'aiutu.
Steti à senta à Didier Duport, u direttori regiunali di a Ghjuventù è di i Sports ma dinò di a Cuesioni Suciali di Corsica.
