Le Direct

Opération de sauvetage : le message du CROSS Med

(A redazzioni d'Alta Frequenza) - Luni, nant'à a basa d'infurmazioni data da testimonii, u CROSS Med in Corsica hà cuurdunatu dui uparazioni impurtanti pà ricircà è salvà ciuttadori persi versu u portu di Bastia è nant'à u situ d'Ancurella, settori di Prupià. Ssi dui intarvinzioni sò stati piantati postu chì ùn c'era nisun elementu novu nè inchietudini furmulati. A Prifittura marittima di Mediterraniu dici ghjustu appuntu chì ssa mubilisazioni forti di i mezi di i servizii di u Statu, nant'à infurmazioni assai debbuli, inghjenna non solu una spesa impurtanti pà u citadinu ma faci dinò pighjà risichi à i salvadori. Poni sminuiscia dinò a dispunibilità di i mezi ingaghjati è penalizà l'uparazioni chì venini. U bon riflessu in casu di perdita di un matiriali in mari hè di chjamà subbitu u CROSS. In casu di prublema arrigulatu da par sè, ci voli à chjamà puru u CROSS chì forsa hè in traccia di ricircà vi. I bon riflessi, cù par asempiu l'appiecazioni di i reguli, sò risichi in menu pà tutti è intarvinzioni cari schisati.