Nouvelle motion du Conseil de l’Ordre des avocats au Barreau d’Ajaccio
(A redazzioni d'Alta Frequenza) - U Cunsighju di l'Ordini di l'Avucati d'Aiacciu hà presu arisera (ghjovi) una dicisioni nova. U cunsighju hà "custatatu chì a missa in asamini sottu à cuntrollu ghjudiziariu di Dumè Ferrari è u so mantenimentu in libertà cunfirmava chì i misuri spettaculari è ecceziunali missi in opara in Aiacciu da un Magistratu contr'à u tarrurisimu parighjinu erani abusivi è micca ghjustificati". Ind'a so muzioni, l'avucati di u Cunsighju ani rigrittatu "torna una volta a mediatisazioni esagerata riservata à ssu cartulari chì hà toccu di manera assai gattiva a maghjina è l'unori di u Raprisintanti di l'Ordini di l'Avucati d'Aiacciu in eserciziu è di un antru avucatu, ma dinò a presunzioni di nucenza ch'elli duviani avè u dirittu di benefizanni com'è tutti i citadini". Da un'antra banda, u cunsighju hè assai scuntentu "di a dicisioni di a camara civili di a Corti d'Appellu di Bastia di u 9 d'uttrovi di u 2014 disprizzendu i cuntistazioni leghjetimi di l'Ordini di l'Avucati di Corsica è susteni l'Ordini di Bastia chì hà cundannatu ss'attitudina di manera ferma". Di pettu à tuttu què, u Cunsighju di l'Ordini hà dicisu à l'unanimità di cuntinuà u so muvimentu di greva fin’è stasera. Infini, l’Ordini di l’Avucati di Bastia hà sceltu d’ùn micca participà à l’audienzi oghji dopu à u ricusu di u tribunali di rimandalli arimani par via di u so muvimentu di greva.
