Nouvelle censure des arrêtés Miot: Alain Spadoni parle d'un véritable "acharnement"
(A redazzioni d'Alta Frequenza) - Torna à Vignale cù u Cunsighju custituziunali ! In un cumunicatu di stampa publicatu ssa dumenica, quissu quì hà annunziatu, ind'u quadru di a legi di finanzi di u 2014, ch'ellu cinsurava torna una volta l'articulu 12 di ssa listessa legi prulunghendu è fendu crescia "u carattaru dirugatoriu di u dispusitivu d'esunerazioni parziali di a parti di i diritti di mutazioni di gratisi di a parti immubiliari di i successioni pà bè è diritti immubiliari in Corsica". Pà u Cunsighju custituziunali, ss'articulu "ùn pighjava micca cunniscenza di l'egualità davanti à a legi è davanti à i carichi publichi", è devi dunqua essa dichjaratu cuntrariu à a Custituzioni. Un dispusitivu chì era dighjà statu cinsuratu rammintemu la da u Cunsighju custituziunali annu, è chì avia inghjinnatu una mubilisazioni impurtanti di a pupulazioni corsa, di i pulitichi, è a criazioni di un cullettivu eppo di un gruppu di travaghju specificu in leia stretta cù u ministeru di i Finanzi. D'uttrovi scorsu, i trè amendamenti posti da i diputati corsi rilativi à a legislazioni di i successioni, erani stati aduttati à l'unanimità eppuru à l'Assemblea naziunali. Un travaghju chì avia parmissu di metta in ballu trè mumenti di transizioni, prima di un ritornu à u dirittu cumunu in u 2023. Cù ssa dicisioni nova, a Corsica intrarà ind'u dirittu cumunu à partasi di u 1a di ghjinnaghju di u 2018, cù una tassazioni nant'à 100% di u valori di i bè cuncirnati; fin'è ssa data, ssa tassazioni sarà di 50%. Prima riazzioni, quilla d'Alain Spadoni, chì faci parti di u cullettivu di a sucità civili ma dinò di u famosu gruppu di travaghju chì hè andatu in Bercy parechji volti. Parla senza prublema di un veru "accanimentu" contr'à qualsiasi dispusizioni chì parmittaria à a Corsica di sorta da ssa prublematica quì.
Steti à senta à Alain Spadoni.
Sur le même sujet
