Nombreux incendies en Corse
(A redazzioni d'Alta Frequenza) - Ci sò stati i fochi torna una volta oghji (vennari). In Corsica Suprana, chì hè stata a più culpita, u focu d'Aghjone hè sempri in corsu. Mezi impurtanti sò sopralocu, cù 5 veiculi è una quindicina d'omi. Spinghjifochi ch'ani da cuntinuà u so travaghju difficiuli ind'a nuttata. U scopu : ammaistrà u sinistru chì hà sfracicatu i riservi di legnu di a SEM Corse Bois Energie. In Santu Petru di Tenda, u focu hè ammaistratu ; hà parcorsu 3 ettari è mezu dipoi u principiu di a matinata. Infini in Prunelli di Fium'Orbu, 20 ettari di canni sò stati calcinati. Quì dinò u focu hè ammaistratu. Malgradu tuttu, nant'à issi dui ultimi sinistri, i mezi di cura sò mantinuti duranti a nuttata, da fà ch'elli pudessini essa spinti di manera difinitiva. In Corsica Suttana, i spinghjifochi ani rializatu dinò numarosi intarvinzioni. Fochi par via di dibbieri mal ammaistrati sò stati censati nant'à i zoni d'Aiacciu, Bastelicaccia, Albitreccia è Calcatoghju.
Sur le même sujet
