Neige en Haute-Corse : le point de la matinée
(A redazzioni d'Alta Frequenza) - Cuntinueghja à nivà nant'à a Corsica Suprana, è ancu ad altitudina bassa. U dipartimentu hè sempri in vigilenza aranciu pà issu risicu "nevi". L'insemi di i mezi di a CTC è quilli di u Cunsighju Ghjinirali sò stati mubilizati nant'à u tarrenu tutta a ghjurnata d'eri (vennari) da snivà i stradi, un affari cumplicatu par via di i nivati chì falavani sempri. Veiculi di u SDIS facini missioni di ricunniscenza ind'i lochi i più tocchi da purtà s'ella ci voli succorsu à i parsoni in difficultà. Da u cantu di a circulazioni, nisunu prublema di particulari da francà a bocca di Vizzavona. Inveci, difficultà sò stati censati nant'à a strada naziunali 193 trà Casamozza è Ponte Leccia. Listessa affari nant'à a RN 198, a nevi appiendu toccu i lochi alti, ma dinò a piaghja, è dunqua nant'à a costa urientali (Aleria, Ghisonaccia). L'arnesi spiciali sò ubligatorii da francà i sfarenti bocchi di a reta dipartimintali, inveci chì quilla di Sorba hè sempri sarrata. I spiazzamenti devini essa limitati dinò à u più nicissariu è fatti fendu casu è cù prudenza. Rinsigneti vi puru ind'è u PC nevi pà cunnoscia i cundizioni da francà i bocchi.
