Naissance du collectif d'avocats Sustegnu Ghjuventù
Sustegnu Ghjuvantù, eccu u nomu llu Cullittivu d’avucati natu dopu à l’azzuffi è i tanti manifistazioni d’issa sittimana.
Issu Cullittivu pruponi di difenda, è di rigalu, i ghjovani chì sariani intarpillati parvia d’azzioni in raportu cù issi rivindicazioni pulitichi. Sarani difesi dinò, è sempri di rigalu, i ghjovani ferti mentri issi mubilisazioni.
Comu hè natu u Cullittivu, è comu hà da viaghjà ?
Steti à senta a risposta di Lauda Maria Poli, una di l’avucati d’issu Cullittivu.
Difenda, è di rigalu, i ghjovani, ch’iddi sichini intarpillati o vittimi : eccu dunqua a mutivazioni d’issu Cullittivu.
Antoine Vinier-Orsetti hè l’avucatu d’una ghjuvanetta di 14 anni chì hè stata ferta à una ghjamba da una bomba acciuncatoghja, à nantu à a piazza llu Diamanti. Eppuri, quiddu dopu meziornu, ùn ci n’era azzuffi par quiddu locu. A ghjuvanetta hà avutu una intarruzzioni di travaddu di 90 ghjorna, cù quidda piaga à nantu à a so ghjamba. È a so annata sculara hè arruvinata.
Hè stata sposta una lagnanza, chì a famidda voli sapè qual’si hè ghjuvatu d’un’arma contru à issa zitiddona chì ùn era in i manifistazioni.
Steti à senta u so avucatu.
