Municipales 2014 à Bastia : le soutien d'Albert Calloni à Jean Zuccarelli
(A redazzioni d'Alta Frequenza) - Ind’una lettara ghjunta ind’a nostra redazzioni, Albert Calloni, u merri di Bastia da u 1997 à u 2001 duranti u passaghju d’Emile Zuccarelli ind’u Ministeru di a Funzioni Publica ind’u guvernu di Lionel Jospin, annunzia ch’ellu susteni à Jean Zuccarelli, candidatu ufficiali di a maghjurità attuali di l’unioni tradiziunali PRG-PC pà i municipali in Bastia. Albert Calloni di fattu voli «fà cunnoscia a permanenza di [u so] impegnu » à fiancu à a municipalità attuali è « difenda l’intaressu ghjinirali », firmendu « assai attenti » à a gistioni di a cità. Ss’ultimu dici dinò chì i quattru ultimi dicennii sò stati « stampati da un sviluppu è un’imbillita maiò di Bastia ». Un sustegnu chì ùn duvaria micca fà piacè à a lista di François Tatti duv’ellu c’hè Eric Calloni, u nipoti d’Albert Calloni, soprattuttu quandu omu s’arricorda chì duranti a so ritirata pulitica in u 2001, Albert Calloni avia lacatu u so futtogliu di cunsighjeru ghjinirali di u cinquesimu cantonu di Bastia, quillu di Lupinu, à Eric Calloni ghjustu appuntu.
Sur le même sujet
