Multiples secours en mer de la SNSM Propriano
Hè intarvinuta parichji volti sabbatu a SNSM di Prupià.
Versu undici ori è quartu, u centru di salvamentu era avirtutu da u CROSS di Corsica è da u CODIS 2A ch’una parsona chì si bagnaia era in difficultà versu l’abbuccà di u Rizzanesi, in Capu Laurosu, à nantu à a cumuna di Prupià.
Hè a famidda chì hà avirtutu chì a parsona era mossa à natà un’ora fà, è chì ventu è currenti l’aviani alluntanata.
Subitu, a imbarcazioni di salvamentu rapidu SNS 654, a VL di cuurdinazioni SNS 926 è un VSAV di i spinghjifoca sò stati ingagiati. Ghjunti prestu supr’à locu, ani presu in carica una parsona di circa sissanta anni à pena in iputermia, avendu luttatu à contra currenti in acqua cutrata.
Fatta a rigulazioni midicali da u SAMU, a parsona hè stata trattata supr’à locu è hè pussuta turrà in casa soia, senza bisognu micca d’evacuazioni midicali.
Versu i dui ori è quartu, u CROSS Med è u CODIS 2A ani sullicitatu i salvadori à mari di u centru SNSM di Prupià da purtà succorsu à unu ghjovanu chì facia u wing-foil, è chì, u maghju di a so vela issendu si ruttu, n’era à svià in golfu di Portipoddu, purtatu da un ventu à Liventi di 25 noda.
Gramazia à i so attrazzi rigulamintarii è supr’à tuttu à u so tilifuninu prutettu da unu stucciu, hà pussutu chjamà u 196 è trasmetta subitu a so pusizioni. A imbarcazioni di salvamentu rapidu SNS 654 l’hà lucalizatu prestu u spurtivu, è l’hà cunturratu salvu è in saluta in portu di Portipoddu.
