Mobilisation de la jeunesse à Corte pour protester contre la situation actuelle en Corse
(A redazzioni d'Alta Frequenza) - Hè ssu marcuri chì hè privista à partasi di dui ori è mezu in Corti una grandi manifestazioni urganizata da a Ghjuventù Indipendentista pà cuntistà a situazioni pulitica attuali in Corsica. Ssi ghjovani volini manifistà pà a difesa di l'arrestu Miot, a cursisazioni di l'impiechi, a cuufficialità di a lingua corsa, u statutu di residenti è a ricunniscenza di a cultura corsa. A Ghjuventù Indipendentista, chì spera chì ssa manifestazioni pulitica sarà un avenimentu "chì firmarà stampatu ind'i menti", hè sustinuta ind'a so dimarchja da parechji urganisazioni, pulitichi soprattuttu. Pà Corsica Libera, "Hè un veru sullevu di custatà chì i nostri ghjovani, propiu cuscenti di l'inghjochi di a situazioni attuali pà tutti i corsi, sighini stati i primi à pighjà iniziativi pà crià u nicissariu raportu di forzi puliticu trà a nostra cumunità naziunali è Parighji". Pà ciò chì tocca Femu a Corsica, l'azzioni di ssi ghjovani "ci rimanda dinò à i nostri rispunsabilità di parsoni maiò, è soprattuttu di rispunsevuli pulitichi chì devini truvà i suluzioni par uttena, di manera demucratica è u più prestu pussibuli, a missa in opara di risposti pulitichi forti à prublemi vitali". U Rinnovu Naziunali insisti nant'à u fattu chì "a ghjuventù corsa mostra a via di u carrughju, scumpartimi a so impazienza è a so ditarminazioni à u mumentu di l'apartura cù u Statu di una sumiglia di prucedimentu di dialogu, chì ùn hè micca accittevuli di pettu à u so calendariu è à u fattu di vulè perda tempu". À parè d'A Manca, ssa manifestazioni hè "soprattuttu un mumentu forti di a nostra storia ricenti duva ghjovani corsi investiscini torna u campu puliticu di pettu à una situazioni è cundizioni di vita cullettivi assai impeghjuriti. Ind'è certi listi prisenti pà l'alizzioni municipali, U Riacquistu di Portivechju parla di una mubilisazioni di a ghjuventù mittendu "in evidenza a spiranza di pudè campà, decida, è travaghjà nant'à a nostra tarra", mentri chì Aiacciu CItà Nova lampa una chjama da fà chì ssa manifestazioni "si passessi di manera pacifica par chì u so scopu ùn sighi micca sviatu à prò di i cunservatori". Infini, u STC Educazione, prisenti à fiancu à i ghjovani manifistanti dipoi u principiu di i so azzioni, faci sapè torna u so sustegnu; un sustegnu "chì si devi cuncretizà oramai inde l'azzioni è a mubilisazioni di tuttu u mondu". Un muvimentu "chì devi crescia", d'appressu à l'urganisazioni sindicali, "da fà chì u Statu pighjessi cuscenza di a nosta scuntintezza di pettu à u so cumpurtamentu ind'u trattamentu di l'inghjochi d'avvena di a nostra tarra è di u nostru populu."
