Meurtre d'un ouvrier marocain : trois personnes mises en garde à vue
(A redazzioni d'Alta Frequenza) - L'inchiesta cuntinueghja dopu à l'assassiniu di un uparaiu maruccanu di 65 anni, Tahid Adaimé, in casa soia ind'a notti di sabbatu à dumenica in Prunelli di Fiumorbu. Iss'umicidiu hè accadutu dopu à un arrubecciu à parè di u vici prucuratori di a Republica di Bastia, Yves Paillard, chì sicondu i primi elementi d'inchiesta di a gendarmeria scludi guasgi l'ipotesi di un trafficu di droghi o di un crimini razzistu. Soprattuttu chì un primu alloghju di travaghjadori vicinu à a casa di a vittima è di u so fratellu hè statu visitatu è filicatu, forsa prima à l'assassiniu, è chì quattru affari simuli di travaghjadori chì si sò fatti arrubà soldi in casa soia sò stati arrighjistrati frà altru ind'a Ghisunaccia è in Abazzia iss'ultimi mesi pà calchì centinai d'auri. Inde unu di iss'affari, i malfattori sò ripartuti i stacchi bioti è ani feritu a so vittima cù un tiru d'arma automatica. U fratellu di a vittima, feritu à i reni da una crussata, ùn hà micca pussutu dà una tistimunianza sana par avà, ma pari chì i malfattori avissini filicatu ind'i stacchi di a vittima dopu ad avè li tiratu adossu. D'appressu ad altri fonti, trè ghjuvanotti, frà i quali dui di a listessa urighjini cà a vittima, ghjunghjendu da a listessa cità è cunnisciuti da i servizii di pulizza pà arrubecciu cù circustanzi gravi in più sò stati missi in guardia custodia pà 48 ori à a gendarmeria di A Ghisunaccia, parquisizioni essendu in corsu in casa soia.
Ecoutez le vice-procureur de la République de Bastia, Yves Paillard.
Sur le même sujet
