Météo: le littoral de la Corse-du-Sud placé en vigilance orange
(A redazzioni d'Alta Frequenza) - U liturali di a Corsica Suttana hè dipoi u principiu di a matinata in vigilenza aranciu, dopu à un bigliettinu publicatu da Météo France. Un fenomenu di marosuli è di summersioni hè privistu da un'ora fin'è mezanotti di sera par via di un ventu di nordu punenti assai forti chì soffia ind'u Golfu di u Lioni, è chì cumencia à sparghja si ind'u meziornu di l'isula. Marosuli forti poni inghjinnà summersioni è inundazioni lucalizati nant'à i parti sposti o più fragili di u liturali, in particulari à u nivellu di u Golfu di Portu, di u Golfu di Sagone, di u meziornu di quillu d'Aiacciu è di Prupià. L'altezzi di i marosuli aspittati sarani trà 4 è 5 metri nentru à i golfi, o ancu 6 metri à u largu. I buffulati di ventu duvariani essa trà 70 è 90 chilometri par ora. Un avenimentu accumpagnatu da acquati forti, cù quantità pudendu andà fin'è 60 mm, com'è quilli d'arimani (marcuri) à pocu pressu, vali à dì un tutali chì pudaria trapassà i 100 mm pà l'episodiu sanu. A prudenza a più maiò hè racumandata.
