Manifestation Simu di stu Paese : Gilles Simeoni déplore les incidents
(A redazzioni d'Alta Frequenza) - In un cumunicatu publicatu ssa dumenica à sera, u merri di Bastia, Gilles Simeoni, hè vultatu annant'à l'incidenti accaduti à a fin di a manifestazioni di u cullettivu Simu di stu Paese sabbatu in Bastia, ellu chì participava à ssa manifestazioni. Quissu quì "rigretta" ss'incidenti, "rigretta i disguasti, difficultà è prublemi à tutti i nivelli inghjinnati da ss'incidenti, è saluteghja u travaghju eccezziunali rializatu da i servizii è l'agenti municipali pà fà vultà à partasi di u currenti di a nuttata a situazioni à a nurmalità". Gilles Simeoni chì si filiciteghja malgradu tuttu di u "successu pupulari, cù par asempiu ghjovani numarosi chì si sò mubilizati pà fà sapè torna u so attaccamentu à a so lingua, a so identità, è tuttu simpliciamenti a so vulintà di campà di manera degna in tarra soia." Gilles Simeoni dici dinò chì "u ricusu di u Statu di pighjà in contu ssi dicisioni hè di modu evidenti una negazioni di a demucrazia è rilancia una logica di tinsioni, è ssa perspettiva ùn pò cà fà piacè à i cunservatori d'ogni parti, in Parighji com'è in Corsica."
