Hè in Corsica ch’iddi si farani quist’annu «LesVoiles de l’Espoir »
Photo : Stéphane Jacquard (Les Voiles de l'Espoir)
(A ridazzioni d'Alta Frequenza) - Dopu à a Linguadoc, a Nurmandia, a Brittagna è a Costa Azura, hè in Corsica ch’iddi si farani quist’annu «LesVoiles de l’Espoir ».
Cumenciani dunqua, issa duminicata, in Pumonti, è duvariani durà una sittimana. Issa manifistazioni nautica impegna ziteddi da 8 à 14 anni, ghjunti d’ugni parti llu mondu, chì si rimettini d’un cancaru o d’una leucimia. A maior’parti d’issi ziteddi sò stati trattati cù una chimiotirappia greva, o ani avutu un insitu di marudda. Monda facini chivi a so prima surtita fora di l’embiu midicali o di famidda. Iss’attività nautica hè dunqua par iddi quant’è un mumentu tamantu di libartà.
Hè pussutu riescia, issa manifistazioni, gramazia à una bedda mubilisazioni è à i chjami lampati pà issi reti suciali. Sò parichji i duttora à essa si dichjarati vulintarii da accumpagnà issi ziteddi.
I ziteddi partini da Aiacciu duminica, par andà sinu à Bonifaziu. Marti, viaghjarani sinu à Portivechju. Eppo’ farani, in trè ghjorna, a stessa strada à l’inversu.
Sur le même sujet
