Les infrastructures de l'ACA sélectionnées pour l'Euro 2016
(A redazzioni d'Alta Frequenza) - L'infurmazioni hè stata cumunicata annant'à u situ ufficiali di l'AC Aiacciu : u club pensa à accoglia una di i 24 squadri naziunali chì participarà à l'Euro di ballò chì veni, chì sarà urganizatu in Francia in u 2016. Attenti, ùn si tratta micca d'accoglia partiti, ben intesu, ma bè una squadra naziunali chì si stallaria in Aiacciu, à u stadiu François Coty. A sucità chì urganizeghja l'Euro 2016 hà ritinutu in fatti i stallazioni di Timizzolu. Fin'è oghji, 66 campi d'intrenamentu sò stati selezziunati da l'urganizatori pà pudè fà participà i cità è i rughjoni chì ùn sò micca stati ritinuti pà accoglia partiti. Sicondu i dirighjenti di l'ACA in Corsica, i stallazioni di Timizzolu sò i soli à pudè risponda di manera sana à tutti i dumandi."A qualità di l'infrastrutturi parmetti à a Corsica di riceva una nazioni. In più di u so tarrenu d'unori duva elli sò ghjucati i scontri di cumpetizioni, l'ACA t'hà 2 tarreni d'intrenamenti à i dimensioni vulsuti da i reguli annant'à u listessu locu à l'altezza di i struzzioni di l'UEFA (trà 23 è 30 mm). Ramintemi chì u club hà investitu più di 10 millioni d'auri dipoi u 2007 pà risponda à i normi di u ballò prufiziunali cù i so partinarii istituziunali" dici u club ind'u so cumunicatu. L'Euro 2016 si ghjucarà da u 10 di ghjunghju fin'è u 10 di lugliu di u 2016. Allora parchì micca l'Alimagna, l'Italia o a Spagna in Aiacciu duranti ssa cumpetizioni ?
