Les grands projets routiers du pays ajaccien
(A redazzioni d'Alta Frequenza) - Paul Giacobbi hà prisintatu stamani (vennari) i grandi prughjetti stradali pà u sviluppu di u paesi aiaccinu da quì à calchì annu. Stamani, in Sarrula Carcupinu, parchì ssa cumuna hè una chjavi impurtanti di ssa ricumpusizioni larga, u presidenti di l'esecutivu di Corsica hà prisintatu i travaghji chì sarani rializati pà ssi lochi. A crucivia giratoghja di Caldaniccia sarà unu di i punti maestri di tuttu u dispusitivu, parchì sarà u locu di partenza di a penetranti d'Aiacciu. Ghjustu appuntu, hè impurtanti di dì chì a strada finali ùn hè ancu stata dicisa, à u cuntrariu di ciò ch'elli vulariani fà creda certi associ. I travaghji di u ghjiratoghju di Caldanicca principiarani bè à a fin di l'annu, ma sarà solu di maghju / ghjugnu chì a cuncertazioni publica pà a strada difinitiva sarà lanciata. Quilla prisintata stamani liarà Caldanicca passendu trà i lotissamenti di a Cunfina, sopra i vigni Peraldi, passarà pà a zona di u futuru uspidali pà ghjunghja fin'è u ghjiratoghju di a Spusata. Tutti i ducumenti poni essa cunsultati nant'à u situ routes.corse.fr. A cumuna di Sarrula hà da divintà, a vidimi, un locu di passaghju essenziali, ciò chì ùn dispiaci mancu appena à u so merri.
Steti à senta à Alexandre Sarrola.
