Les épreuves du baccalauréat 2018 ont débuté hier
(A ridazzioni d'Alta Frequenza) - Com’è ugni annu, hè cuminciata a sissioni llu baccu llu 2018 cù a prova di filusuffia, una prova ch’iddi temini à veru i candidati. Com’è ugni annu, a scelta c’era trà dui sughjetta di dissirtazioni è un cumentu di scrittu. Pà a siria L, ci hè vulsutu à rifletta à issa prublimatica, « a cultura ci rindarà di più umanu ? », o ancu à cumintà « u mondu da vulintà è da riprisintazioni », d’Arthur Schopenhauer. Pà a siria S, tuccaia à rifletta à unu strattu di u « Sistema di Logica » di John Stuart Mill, o à pruducia issa dissirtazioni : « Risenta à inghjustizia, sarà nicissariu da sapè ciò chì hè ghjustu ? » « Si pudarà essa insinsibuli à l’arti ? » eccu a quistioni posta à a siria ES, à fiancu à un strattu di i « formi elemintarii lla vita rilighjosa » di Durkheim. Par finiscia, i sirii ticnulogichi ani matriculatu da sapè sè « a spirienza pò essa tradimintosa », ma pudiani dinò rifletta à un strattu llu « spiritu lli legi » di Montesquieu.
Sur le même sujet
