Les dépôts pétroliers de Corse bloqués : le point sur la situation
(A redazzioni d'Alta Frequenza) - U dipositu petrulieru di Lucciana hè torna bluccatu ssu vennari da mani da a CGT. U sindicatu, chì avia suspesu u blucchimi arimani dopu meziornu, hà dunqua ripresu a so azzioni, postu ch’ellu ùn hà micca custatatu muvimenti pusitivi à u nivellu di u guvernu pà vultà nant’à a famosa legi Travaghju. U blucchimi cuntinueghja dinò in u dipositu di u Vaziu, cù un cunflittu doppiu, postu chì aldilà di a scuntintezza contr’à a legi El Khomri, l’impiegati di u dipositu facini valè dipoi un certu tempu oramai rivindicazioni più specifichi à a so intrapresa. Pà ciò chì tocca l’autorità, a prifittura di Corsica Suttana hà mandatu un cumunicatu arisera. Par via di una dumanda assai superiori di pettu à a nurmali, a situazioni di i stazioni serviziu hè impeghjurita dipoi ssu ghjovi in mità di dopu meziornu. In fatti, dipoi arisera à 8 ori, nant’à i 59 stazioni di u dipartimentu, 21 sò oramai sarrati o guasgi à seccu. Misuri adattati sarani missi in ballu à partasi di stamani in funzioni di a situazioni di i dipositi petrulieri di u Vaziu è di Lucciana, chì t’ani i stocks nicissarii. A distribuzioni di benzina ind’i recipienti purtevuli, com’è i jerrican, ferma pruibita. Infini pà contu soiu, a prifittura di Corsica Suprana hà cumunicatu in principiu di sirata nant’à a situazioni di l’alimentazioni di i sittantunu stazioni di u dipartimentu. Sicondu a prifittura, a so integralità saria in misura di prupona ssu vennari da mani essenza è gasoil. Cuncirnendu i stocks dispunibuli in u dipositu di Lucciana, bastani è sarani cumplittati in principiu di sittimana chì veni da una distribuzioni nova. In ssu cumunicatu, u prifettu di Corsica Suprana, Alain Thirion, chjama a pupulazioni à ùn cambià micca i so abitudini di cunsumazioni pà tena i stocks. Dumanda pà raghjoni evidenti di securità è di privenzioni di u risicu di focu, d’ùn fà micca stocks di benzina, soprattuttu ind’i jerrican.
Sur le même sujet
