Les baudruches de Scandola
(A redazzioni d'Alta Frequenza) - U ballò mediaticu chì hà ingufiatu è ingufiatu arimani (luni) in prupurzioni dramatichi s'hè sgunfiatu com'è s'è nulla ùn fussi grazia à un ventu di nordu punenti. Certi media si sò spicciati pà annigriscia - senza ghjocu di parolli - una situazioni micca sicura è micca verificata, gattivu sintimu datu da a prifittura marittima di Tulò, ùn si sà micca di manera pricisa quali hè chì hà inghjinnatu - sempri senza ghjocu di parolli - ssa vera timpesta ind'un bichjeru d'acqua. Ciò chì hè sicuru hè chì a pulluzioni vulintari in mari - parchì era bè què - hè, par disgrazia, una situazioni chì accadi guasgi tutti i ghjorni. Ed hè quì chì l'affari faci mali parchì ssa "nurmalità" ùn intaressa tantu i media à quali piacini i colpi mediatichi è "veri" catastrofi chì pudariani intarissà millai è millai di curiosi. U cumunicatu di François Alfonsi diffusatu stamani (marti) và appena in ssu sensu quì quand'ellu cundanna a banalisazioni di ssi pulluzioni in mari è di u lascià corra di i puteri publichi. Ùn saremi micca sempri furtunati priciseghja u diputatu aurupeu è un ghjornu o l'altru a catastrofa ùn pudarà micca essa sguassata. U merri d'Osani - chì sà di cosa ellu parla parchì hè in prima ligna - rigretta chì nisun pulitica cuerenti fussi stata riflittuta è missa in ballu è cundanna i mezi chì sò veramenti pochi pà riagiscia à ssu gennaru di situazioni oghji.
Sur le même sujet
