Législatives : les choix de Femu A Corsica
Marti à sera, Femu a Corsica hà difinitu a so pusizioni pà l’alizzioni lighjislativi : l’ughjittivu è di mantena, è ancu di middurà u risultatu. Par quissa, u muvimentu hà dicisu, mentri u so cunsigliu llu 14 d’aprili, di fà sbuccià i cundizioni lla rializzioni di i trè diputati naziunalisti, è di travaddà à un’ufferta pulitica da pudè vincia a prima circuscrizzioni llu Pumonti.
Dici u muvimentu ch’iddu si n’hè tinutu à issi principia chivi.
Dighjà, ùn mittindu candidatu in a siconda circuscrizzioni llu Pumonti, da ùn fà cuncurrenza à u diputatu Paul-André Colombani.
Po’ attimpendu a so dicisioni pà a prima circuscrizzioni Pumuntinca, aspittendu una discussioni pulitica cù tutti i forzi – masimu i muvimenta naziunalisti - in circa d’un’alternativa à a candidatura llu diputatu in postu.
Faci u custatu, u muvimentu, ch’issi principia ùn sò stati sempri missi in anda da l’altri forzi, nè da i candidati naziunalisti ch’erani di a dimarchja lli lighjislativi pà u 2017.
Cusì n’hè statu in a siconda circuscrizzioni llu Cismonti, ind’iddu hè diputatu Jean-Félix Acquaviva, ma ancu in a prima circuscrizzioni llu Pumonti, ind’idda hè affaccata senza cuncirtazioni una candidatura.
Tandu, u Cunsigliu di Femu a Corsica hà datu cunfirma di i candidaturi di Michel Castellani è Jean-Félix Acquaviva, hà validatu a candidatura di Rumanu Colonna in a prima circuscrizzioni llu Pumonti, è hà mantinutu u so principiu d’ùn prisintà ni candidatu, in a siconda circuscrizzioni llu Pumonti.
