Législatives : Jean Jacques Ferrara se retire de la course

« Oghji, passata u stipidu d’un cambiamentu ch’ùn u m’aspittaiu, è presu u tempu lla riflissioni, mi pari chì a cunfigurazioni chì m’hè stata imposta ùn mi permetti di purtà un ingagiamentu puliticu in cunfurmità cù i me valori, è di sullicità i voti di i citadini lla prima circuscrizzioni llu Pumonti ».
Jean-Jacques Ferrara, u diputatu lla prima circuscrizzioni pumuntinca, dici, cù issi parolli, ch’iddu si ritira da a cursa pà l’alizzioni lighjislativi. L’affari veni dopu à l’annunciu di candidatura di Laurent Marcangeli.

Dici Jean-Jacques Ferrara chì, « fidu à i valori chì li sò stati trasmissi, chì u portani à u cutidianu, (hà) sempri fattu di tal’manera chì a custanza, a lialtà è l’impatia sichini in cori à u (so) impegnu puliticu ».

« Sò quindici anni ch’e’ circu à tena issu filu cù dignità, à u sirviziu lla cità d’Aiacciu è di a Corsica... », dici u diputatu, chì faci u bilanciu d’un mandatu « purtatu cù u pinseri sempri di l’intaressi di a Corsica è di a Nazioni. In u me ultimu raportu à nantu à a difesa in u Maritarraniu, fattu innanzi à l’assaltu russiu in Ucraina, m’impinsiriu chì a Russia sichi fattori di distabilisazioni à u nosciu zuddu, è ch’iddu ci vulia à essa pronti di pettu à i risichi pà a noscia sicurità, cundizioni prima di a noscia libartà ».

Dici dopu ch’iddu hè statu « di i travaddi parlamintarii liati à a Corsica, intarrughendu rigularmenti u guvernu pà i so intinzioni è pruposti pà a noscia isula. Dopu à l’assassiniu d’Yvan Colonna in prighjoni d’Arles, (hà) participatu à l’audizioni fatti in urgenza da a cumissioni lli legi, da pruvà à schjarì u fà d’iss’evenimenti ».

« Sintindu mi cù i diputati corsi, aghju travaddatu, longu à u me mandatu, cù riprisintenti di a maiurità è di l’uppusizioni, in Corsica quant’è in parigi », dici u diputatu, pricisendu ch’iddu « hà datu u favori à u travaddu llu tarrenu, inveci di stà si ni scantatu in unu scagnu, ch’iddu sichi in Aiacciu o in parigi ».

« Cuscenti di i situazioni naziunali è lucali, fermu attenti par ciò chì tocca à l’evuluzioni lla situazioni, masimu pà issi dibattiti à vena à nantu à u statutu lla Corsica », dici in chjudenda Jean-Jacques Ferrara, chì hè prontu à risponda à i sullicitazioni di quiddi chì pensani ch’iddu pudaria essa utuli.