Le soutien du Conseil de l’Ordre du Barreau d’Ajaccio et du Bâtonnier de Bastia à Me Philippe Gatti
(A redazzioni d'Alta Frequenza) - U Cunsighju di l'Ordini di l'Avucati d'Aiacciu, in un cumunicatu, cundanna cù forza i fatti accaduti ssu marti dopu à l'audienza di u tribunali currizziunali d'Aiacciu. Philippe Gatti, avucatu di u privenutu inde l'affari dittu "Intersport", hè statu presu à partita da un omu chì li dumandava conti cuncirnendu u sensu di a so avucata. U Cunsighju di l'Ordini ramenta chì l'avucatu, quand'ellu porta u so vistitu, t'hà una libertà di sprissioni tutali. Ùn hè micca tularabili, dici l'Ordini, chì hà campatu di manera crudeli drami ricenti, chì qualsiasi parsona si cridissi autorizata à intimichiscia o à fà prissioni nant'à un avucatu dopu à un'audienza. Hè tristu di custatà, cuntinueghja u cumunicatu, chì pà ssu principiu di 21esimu seculu, si pudissi cuntinuà à pinsà chì certi ùn meritani micca d'essa difesi. Hè u cori battenti di u mistieru cà d'alzassi in sustegnu à quillu chì hè persu, si pò leghja dinò. À quilli chì facini a cultura di l'indegnazioni selettiva è chì si ghjovani di i reti suciali pà strumintalizà l'upinioni è a ghjustizia, l'Ordini d'Aiacciu ramenta chì l'avucatu ùn devi micca essa disturbatu in u quadru di l'eserciziu di a so missioni. Un testu chì hè largamenti spartutu da l'Ordini di Bastia, chì arreca u so sustegnu sanu à Philippe Gatti. L'Ordini bastiacciu ramenta anch'ellu chì i diritti di a difesa s'accumpagnani d'una sprissioni libara è forti.
Sur le même sujet
