Le Napoléon Bonaparte va-t-il sombrer ?
Le Napoléon Bonapart va-t-il sombrer ?
(A redazzioni d'Alta Frequenza) - U Napoléon Bonaparte, battellu di a SNCM, s'hà da affundà o micca ? A quistioni si poni in issu principiu di dopu meziornu, mentri chì quissu quì si trova ind'u portu di Marseghja dopu ad avè avutu disguasti impurtanti di pettu à u gattivu tempu in Pruvenza. In fatti, prestu da mani (dumenica), a punta di u battellu hà pichjatu contr'à u molu, inghjinnendu un'apartura duva l'acqua ghjentri dipoi parechji ori oramai. U battellu parti à diritta è minaccia d'affundà si o di vultà si, malgradu i sforzi di i salvadori pà mantena lu. U prifettu di rughjoni Hugues Parant hè andatu sopralocu è hà pricisatu chì u battellu tuccava u fondu. Un rimorcadori hè statu mubilizatu pà pruvà à stabiliscia u bastimentu. Ciuttadori duvariani intarvena pà culmà l'apartura. U Napoléon Bonaparte hè oghji u battellu u più emblematicu di a SNCM dipoi u 1976, data di a so criazioni. Issu battellu, di un prezzu stimatu à 65 millioni d'auri, hè oghji minacciatu. Da nutà chì iss'ultimu ùn navigava micca è ùn avia à u so bordu nisun passaghjeru à u mumentu di l'accidenti. Ùn ci hè micca feritu dunqua. Aldilà di u naufragiu, chì si pò tema, una cellula di crisa hè stata missa in ballu da evaluà i disguasti u più prestu pussibuli, è soprattuttu pà schisà una catastrofa eculogica. Iss'ipotesi hè stata scartata da a SNCM. Malgrad tuttu, u portu di Marseghja hè stata sarratu.
Sur le même sujet
