Le FLNC revendique la série d'attentats contre des grandes surfaces en Corse
(A redazzioni d'Alta Frequenza) - Dopu à l’attentati chì ani toccu parechji grandi magazeni in Corsica ind’a notti di dumenica à luni, u FLNC, ind’un cumunicatu di stampa rivindicheghja a campagna d’azzioni rializata. Quissa quì « si scrivi in seguita à i lotti suciali è sindicali di u nostru populu di pettu à i reti à parechji di u culunialisimu francesi in Corsica". "I patroni di a grandi distrubuzioni ùn ani micca sappiutu pighjà a misura di l'aspirazioni suciali di u nostru populu è ani insistutu ind'a so pulitica da impuvariscia a sucità corsa", cuntinueghja u FLNC, parlendu ancu "di prezzi chì ùn sò mai stati cusì alti in Corsica". "U populu corsu ùn devi micca suppurtà l'eccessi di l'appetitti di i grandi azziunarii di a grandi distribuzioni." L'urganisazioni clandestina dinunzia dinò "paghi troppu bassi dati da iss'insegni, i prissioni nant'à i spalli di u parsunali corsu, l'impiecu di parsunali ghjuntu da fora, à spessu senza rispettu di i cunvenzioni cullettivi cù una precarisazioni di l'impiechi". U FLNC cunsighja di modu forti à i rispunsevuli di a grandi distribuzioni : "di calà di manera significativa i prezzi nanzi à u mesi di dicembri di u 2012, di participà à un'adunita cù l'attori di a sucità corsa nant'à l'usservazioni di i prezzi, mudificà a strategia cumirciali impunendu si com'è assu priuritariu, una pulitica à prò à u più di i prudutti isciuti da l'ecunumia corsa." È di cuntinuà, "sapparemi firmà attenti à qualsiasi evuluzioni. À partasi d'avà, ci scrivimi contr'à qualsiasi ghjunta nova di un grandi magazenu". È u FLNC di cuncludi ch'ellu s'uppunarà à "a sparizioni prugrammata di u cumerciu corsu di vicinanza chì devi firmà un arnesi di cuesioni suciali".
