Le FLNC du 22 octobre met en garde l'Etat Islamique

(A Ridazzioni d'Alta Frequenza) - In un cumunicatu di stampa mandatu à i nosci culleghi di Corse-Matin, u FLNC dittu di u 22 d'Uttrovi hà riagitu à l'attintati islamisti sempri più numarosi. In issa cumunicazioni, i « clandistini » s'adirizzani à i « musulmani di Corsica », à « l'islamisti radicali di Corsica » è à u « statu francesu ». À i musulmani di Corsica, « primi è principali vittimi di a barbaria di u giadismu, u FLNC dumanda di piddà pusizioni manifistendu à u so latu contru à l'islamu radicali (…) insignendu li cumpurtamenti sviati ind'è i ghjovani à ribaldonu, ch'avariani a tintazioni lla radicalisazioni. U FLNC dittu « di u 22 d'Uttrovi » evuchighja a nuzioni di « cumunità di distinu » da vincia l'EI s'iddu vinissi à rivindicà azzioni in tarra corsa. À l'islamisti radicali, mintuvati da « pridicatori di morti », u muvimentu clandistinu dichjara : « a voscia filusuffia medievali ùn ci spaventa. Sappiati ch'ugni attaccu contru à u nosciu populu avarà una risposta ferma è senza tanti matriculi da a noscia parti ». U cumunicatu dici dinò chì «  a cunfusioni ùn nasci chè in a menti lli debbuli è u populu Corsu hè forti (…) di scelti pulitichi difficiuli chì mai ùn ci ani fattu cascà com'è vo' in a barbaria ». Infini, u FLNC dittu « di u 22 d'Uttrovi » amenta a rispunsabilità lla francia, è di l'Uccidenti più largamenti, in a situazioni d'oghji. Pà i « clandistini », « ci vurrà ch'idda a faccia a finita a francia cù a so tindenza à intarvena militariamenti è à dà lizioni di dimucrazia à u mondu sanu, s'idda voli chì i cunflitti suminati par issu mondu ùn li voltini in faccia, in tarra soia ». U FLNC dici chì sè una stragi duvia succeda ind'è no', u statu francesu avaria tandu una rispunsabilità maiori, chì cunnosci i salafisti di Corsica. Sariani ottu, è avemu acirtezza chì unu di l'imami hè un indicatori di a pulizza ». Pà i « clandistini » sempri, a Corsica a si saria sfrancata d'un attintatu. Accertani issi naziunalisti « avè fattu fiascà di ghjunghju, à nantu à u nosciu tarritoriu, un attintatu in un locu fraquintatu da u publicu ». U FLNC dittu « di u 22 d'Uttrovi » chjama u Populu Corsu à essa attenti ma calmu di pettu à a barbaria, pricisendu quantunca chì « quiddi ch'ind'è no' si sentini una parintia cù partiti o associ di strema dritta si sbagliani di lotta ». U FLNC pricisa dinò chì una coppia d'issa cumunicazioni hè stata mandata à u Prisidenti llu Cunsigliu Esecutivu è à u rispunsevuli llu cultu musulmanu.