Le conseil municipal de Bastia va voter l'éviction de Julien Morganti du poste d'adjoint
(A redazzioni d'Alta Frequenza) - U cunflittu apartu, par ùn dì a guerra trà Gilles Simeoni è François Tatti cunnosci un evenimentu novu. In fatti, marti, duranti u cunsighju municipali di a cità di Bastia, i cunsighjeri municipali sarani invitati à vutà pà o contr'à u mantenimentu di Julien Morganti, quattriesimu aghjuntu dilegatu à l'infrastrutturi è à l'accunciamenti urbani, ind'i so funzioni. Un casu stremu chì và più luntanu cà u simplici fattu di caccià i dilegazioni di un aghjuntu postu chì quissu quì, in casu di votu negativu, divintaria solu torna un simplici cunsighjeru municipali, cù a calata di a so paga chì ci currispondi. Ci voli à dì chì Julien Morganti hè l'omu di cunfidenza di François Tatti dipoi parechji anni, mentri chì Leslie Pellegri par asempiu, chì faci parti eppuru di u MCD di François Tatti, ùn hè micca inchietata parchì pari podassi menu in leia ss'ultimi sittimani cù u presidenti di a CAB à u nivellu municipali. In un cumunicatu, u MCD dinunzia un "prucessu puliticu", "chì inchieta pà u rispettu di i valori demucratichi", è si dici "stupitu di custatà chì l'eserciziu [di u puteri da Gilles Simeoni] hè cuntrariu à i principi chì avariani pussutu fà a riescita è u successu di un'allienza pulitica". Infini, u MCD cunsidareghja ch'ellu ùn pò micca "essa trattatu com'è un marchjapedi pà suddisfà l'ambizioni parsunali di Gilles Simeoni è solu regiunali, à u dannu di Bastia".
Sur le même sujet
