Le conflit social, sous tension, continue à la Méridionale
Nudda ùn cambia par avali in u cunflittu suciali di a « Méridionale ».
U STC d’issa cumpagnia dumanda ch’idda sichi tinuta a prumessa d’un’ufferta cumuna « Méridionale-Corsica Linea » pà u cartulari lla SEMOP, prumessa ch’idd’avariani fattu i dui dirizzioni di cumpagnii. In tantu, sò bluccati in Marseglia cinqui navi, dui di a « Méridionale » è trè di a « Corsica Linea ».
In stu mentri, u STC di a « Corsica Linea » hà fattu un cumunicatu, ch’ùn hè cusì dilicatu pà i so cumpari di l’altra cumpagnia.
I marinari di a « Corsica Linea » si dicini offesi da i scrizzioni chì i dicini « vinduti ». Sò surpresi dinò ch’idd’ùn sichi stata attaccata a famidda Lemor, azziunaria lla cumpagnia è rispunsevuli, à senta li, di issu cunflittu.
U STC di a « Corsica Linea » allistinighja tuttu ciò ch’idd’hà uttinutu da a so cumpagnia, è spieca u so silenziu d’iss’ultimi mesa : Cyril Venouil ùn hà rispostu à un currieri chì l’hè statu mandatu u 25 di frivaghju scursu, par ciò chì tocca à l’offerta di u sirviziu marittimu di a Corsica. « Hè d’ùn avè ci datu risposta chì marca a rumpitura llu dialugu », dici u STC « Corsica Linea ».
In chjudenda, u STC di a « Corsica Linea » ni chjama quiddi chì sò impignati in issa situazioni à « sfrancà si la da issi pruvucazioni chì a so causa ùn la servini, moltu più s’iddu si tratta d’un’andatura chì, à senta li, liaria i nosci dui cumpagnii ».
Sur le même sujet
