Le CNOSF refuse de concilier le SC Bastia et la FFF pour les sanctions du derby SCB - ACA
(A redazzioni d'Alta Frequenza) - Ind'un cumunicatu, u SC Bastia annunzia chì u CNOSF hà dicisu di ùn cuncilià micca u club è a Federazoni Francesi di Ballò pà ciò chì tocca u scontru senza publicu è nant'à un tarrenu neutru contr'à l'AC Aiacciu; una sanzioni accaduta dopu à u derby SCB - ACA di u 2 di marzu scorsu. U CNOSF hà dumandatu à u club di firmà si à a dicisioni di a cumissioni d'appellu di a FFF annant'à ssu sughjettu. U Sporting "rigretta à volta u risultatu è u fattu chì ssa "cunciliazioni" intarvinessi cusì tardi, più di un mesi dopu à l'appellu di u CNOSF è dui settimani dopu à l'audizioni di i raprisintanti di u Sporting (a FFF ùn essendu micca ghjunta à a cunciliazioni di u 7 d'uttrovi)." U club bastiacciu priciseghja dinò chì "l'appellu di u tribunali amministrativu di Bastia di a dicisioni di a cumissioni superiori d'appellu di a FFF hè divintata impussibuli à parechji nivelli di pettu à u fattu chì u scontru di 16i di finali di a Cuppa di a Lega SCB-ACA, chì si ghjucarà u marti u 29 d'uttrovi, sighi troppu vicinu.", spiechendu a scelta di u stadiu Francis Turcan di Martigues pà ssu scontru. Infini, u club priciseghja ch'ellu andarà "fin'è a fini di i pruceduri par avè ghjustizia è riparazioni di u preghjudiziu di ssa suspensioni. U lindumani dopu à u scontru, l'avucatu di u club dumandarà un'annulazioni contr'à i dicisioni di l'istanzi, davanti à u tribunali amministrativu di Bastia."
