La Ligue de Football Professionnel sanctionne le SC Bastia
(A redazzioni d'Alta Frequenza) - A Lega di Ballò Prufessiunali a resu a so dicisioni arisera (ghjovi) dopu à l’incindenti à a fini di u scontru Bastia-Lens, sabbatu scorsu. In fatti, a LFP hà dicisu di suspenda u stadiu Armand Cesari di modu cunservatoriu, pà « numarosi mancanzi di u SC Bastia inde l’urganisazioni è a gistioni di a securità duranti a partita, è l’accatamanzera di l’incidenti dipoi u principiu di a staghjoni ». Dunqua, fin’è à un avisu cuntrariu, u Sporting Club di Bastia sarà dunqua ubligatu di ghjucà da mari in là i so scontri ditti « in casa soia ». U Sporting ùn pò micca fà appelu di issa misura quì chì pudaria inghjinnà altri sanzioni in più. I so dirighjenti è i raprisintanti di a Lega devini ritruvà si u 24 di nuvembri prossimu, dunqua par avà, u Sporting ùn pudarà micca ghjucà in Armand Cesari pà a partita contr’à Alres-Avignon. Da nutà dinò chì u difensori bastiacciu, Gilles Cioni, hè statu suspesu pà 4 scontri, dopu à a so sclusioni contr ‘à Lens. Dopu à issa decisioni, una riunioni di crisi si tinarà stasera à 5 ori à u stadiu Armand Cesari, cù i dirighjenti, u prifettu di Corsica Suprana, Louis Lefranc, di u prucuratori di a Republica di Bastia, Dominique Alzeari, è di u diputatu Sauveur Gandolfi-Scheit. Da u cantu di Lens, Sow pighja pà contu soiu dui scontri di suspensioni, inveci chì Gabriel Cichero hè suspesu di modu cunservatoriu, dunqua fin’è a fini di a struzzioni. Eppo, malgradu issu colpu forti purtatu à a squadra, u spurtivu ripighja i so diritti stasera in Amiens ind’u quadru di a dodicesima ghjurnata di Lega 2. Contr’à ghjucadori di Amiens, ind’a zona di rilegazioni, u Sporting, terzu, duvarà pruvà à sminticà duranti una stonda a sorti chì l’hè fatta da vultà di Picardia cù un bon’risultatu. Da u so cantu, Cioni suspesu è Vincent feritu, lacani u so postu à Marque è Sanaia. Un scontru da principiàà 8 ori di sera, à u stadiu di a Licorne.
