La gestion des déchets vue par François Alfonsi
(A redazzioni d'Alta Frequenza) - A gistioni di i rumenzuli! L'annata principia com'ella s'hè compia, cù l'ammansera, appena dapartuttu in Corsica, di mulizzu chì ghjunghji da a nostra sucità di cunsumazioni. Ùn ghjittetini più, sbarsa!, dicia u slogan. Postu ch'ellu si ghjetta torna, hè di sapè di una manera pricisa induva. Malgradu l'attribuzioni, dipoi u 1a di ghjinnaghju, di una quantità massima à l'annu pà i trè centri d'intarru di i rumenzuli di Corsica, a situazioni ùn s'hè micca migliurata pà daveru parchì ind'i trè rughjoni, i cumitati di difesa si sò trasfurmati in cumitati d'interdizzioni. In Tallone è in Vighjaneddu, cumitati di vigilenza ani ristrettu i quantità à ghjornu à 120 tunnellati, è dunqua bellu luntanu di pudè accoglia i soprapiù inghjinnati da i festi di fin d'annata. In Vicu, a situazioni hè diffarenti parchì u cumitatu riserva sempri l'accessu di u centru à i rumenzuli chì ghjunghjini solu da i so lochi vicini. 4000 tunnellati aspittariani dunqua, frà i quali più di 1400 pà a sola CAPA è senza distinazioni. Dumani (marti), com'ella s'hè fatta a sittimana scorsa, i dilegazioni di i trè cumitati scuntrarani l'uffiziu di l'ambienti di a Corsica. Senza cumpitenzi riali pà contu soiu annant'à ssa quistioni difficiuli, à chì ghjovani ssi riunioni?
Steti à senta à Francescu Alfonsi, u merri d'Osani.
