La FSU de Corse appelle à la grève dans l’Education nationale ce mardi
(A redazzioni d'Alta Frequenza) - A FSU chjama ssu marti à fà greva inde l’Educazioni naziunali, in Corsica com’è in Francia sana. Pà a Federazioni Sindicali Unitaria è i so sindicati, « a pulitica educativa missa in opara da u guvernu ùn rispondi micca à i bisogni di a ghjuventù è à ciò ch’elli aspettani i parsunali ». « Si custata chì l’arrestu di a suppressioni di posti ùn hà micca cumpensatu a riduzzioni assai forti di l’effettivi rializata da u guvernu Sarkozy-Fillon. Dinò, i cundizioni d’eserciziu di u mistieru d’insignanti fermani difficiuli in un cuntestu di crisi ecunomica è suciali chì inchieta assai. S’aghjusta à què u fattu ch’ellu cuntinuessi u blucchimi di i paghi, a crescita di i cuntratti precarii, una furmazioni prufiziunali iniziali assai cuntistata, una furmazioni prufiziunali cuntinua chì ùn asisti guasgi micca è un’assenza tutali di perspettiva pà ciò chì tocca a valurisazioni nova di i missioni è di i mistieri », aghjusta a FSU. « L’attentati di u 7 è di u 9 di ghjinnaghju di u 2015 ani dimustratu chì l’educazioni duvaria essa una priurità naziunali pà pudè luttà contr’à a cullata di u scurantisimu chì pighja surghjenti par asempiu ind’u fiascu sculari è a scunniscenza di i valori fundamintali chì sò a laicità, a tulerenza, è u rispettu mutuali », cuntinueghja a Federazioni Sindicali Unitaria. Quissa quì « hè cunvinta chì l’avvena di a nostra ghjuventù passa pà a Scola publica è u rispettu di i so parsunali. Dumanda dinò à u guvernu di dà à u serviziu publicu d’educazioni i mezi indispinsevuli pà pudè assicurà i so missioni ».
Sur le même sujet
