La Corse, terre de déserts médicaux
(A redazzioni d'Alta Frequenza) - A Corsica hè una tarra di diserti medicali ? Hè a dumanda chì si poni sempri è chì hè sustinuta oghji da un studiu publicatu da l'UFC-Que Choisir. Un studiu naziunali chì faci u puntu nant'à a prublematica di l'accessu à i curi, quattru anni dopu à un primu bilanciu. Quattru spicialità sò stati scelti : i generalisti, l'uftalmulugisti, i ginecologhi è i pediatri. U custatu hè chjaru : i diserti medicali sò impeghjuriti è l'unurarii trapassati da i medichi sò in crescita. Calchì sciffru maiò pà dimustrà ssa situazioni inde l'isula : dipoi u 2012, 20% di l'abitanti ani vistu u so accessu geugrafficu à i medichi generalisti rinculà, 4% di a pupulazioni hà vistu riduciasi l'accessu à l'uftalmulugisti, 34% à i pediatri è ancu 37% pà i ginecologhi. In u 2016, hè 15% di a pupulazioni di a Corsica chì campa in un disertu medicali pà l'accessu à i generalisti è fin'è 30% pà i pediatri. Cuncirnendu l'unurarii trapassati, s'è i duttori generalisti a facini pocu, si generalizeghjani inveci ind'è i spicialisti, par asempiu i ginecologhi è l'uftalmulugisti, ciò chì faci crescia i difficultà pà l'usadori à truvà un medicu à un prezzu currettu. Oghji, l'UFC-Que Choisir lampa una chjama à i puteri publichi, i parlementarii soprattuttu, pà pinsà à cambià u sistema di saluta cù dui misuri forti : a sarratura di l'accessu à u settori di l'unurarii libari trapassati è un cunvinziunamentu selettivu di i medichi. U studiu cumplettu par ogni cumuna hè dispunibuli nant'à u situ internet www.quechoisir.org
Steti à senta à Marc Jouatte.
Sur le même sujet
