La Corse ne cesse de voir sa population augmenter selon l'INSEE : les migrations principale cause de la hausse
(A ridazzioni d'Alta Frequenza) - In sta fin’d’annata, l’INSEE publichighja i sciffri lla pupulazioni lla Corsica, stabbiliti à u 1u di ghjinnaghju llu 2017.
A Corsica, cù i so 334 938 abitanti hè a righjoni chì a so pupulazioni cresci u più, cù 1,1 % di crescita à l’annu, vali à dì più di dui volti a media naziunali.
In quantu à i dipartimenti, u Pumonti hè quartu è u Cismonti dicesimu d’issa classifica.
Fatta fini, a Corsica si hà buscu 35 700 parsoni in più trà u 2007 è u 2017. I nasciti è i morti issendu pari, issa crescita ùn pò avè par causa chè a migrazioni, dici l’INSEE.
U Cismonti conta 177 689 abitanti, è u Pumonti 157 249.
Aiacciu ni ghjunghji oghji à 70 659 abitanti ; erani 66 245 in u 2012.
In Bastia, sò 45 715 ; erani 43 479 in u 2012. Cuntendu i cumuni di l’arghja urbana di Bastia, com’è Furiani o Biguglia, si ni ghjunghji à tuccà i 68 842 abitanti.
Cù issa crescita menu forti, Bastia, puri aghjustendu ci quist’arghja stesa, si ferma daretu à Aiacciu.
Portivechju ferma a terza cità lla Corsica, cù 12 042 abitanti. A crescita chivi hè stata di 2000 abitanti in trè anni.
Daretu veni u Borgu, cù 8760 abitanti. Lucciana, cù 5780 abitanti, vali à dì middi di più in cinqui anni, hè oramai a sittesima cità di Corsica, davanti à Furiani è Calvi.
Infini, a Balagna strazia in issa classifica, puri tinindu contu d’una piccula crescita in Calvi chì, incù 5 559 abitanti, si n’hà vintu quaranta in cinqui anni. Lisula, à nantu à u tarritoriu lla so arghja urbana, si n’hè falata à 4 966 abitanti. Erani 5 480 cinqui anni innanzi.
Sur le même sujet
