La Corse, championne de la croissance démographique, passe le cap des 330 000 habitants selon l'INSEE
(A ridazzioni d'Alta Frequenza) - À u 1u di ghjinnaghju llu 2016, erani 330 455 l’abitanti lla Corsica. Quissa a dici un studiu publicatu ghjovi da l’INSEE. In un contu di cinqu’anni (2011-2016), hè crisciuta a pupulazioni lla Corsica di 5,1 %, cù una media di 1 % à l’annu, vali à dì chì a Corsica si godi 16000 abitanti in più. A Corsica hè dunqua u locu di francia cù a più forti crescita lla dimugraffia in issu periudu, a media naziunali par cinqui anni issendu di 2,2 %. Ma issa crescita, in Corsica, ùn hà a stessa urigina chè in francia : a prugrissioni à nantu à l’isula ùn hè chè quidda lla migrazioni. Si vidi ancu di più in li paesi di l’internu : quiddi chì t’ani menu di 250 abitanti ùn ani nisciun’ prugrissioni, ma u contu naturali, chì cala di 1 % à l’annu, hè rimpattatu da i ghjunti di fora. I paesa da 205 à 1000 abitanti t’ani ancu iddi una situazioni chì s’avvicina à quissa chivi. Sò i circondi aiaccini è bastiacci chì si godini a prugrissioni a più forti, cù una crescita di 0,7 % à l’annu pà Aiacciu, Bastia è sei cumuni cunfinaghji di Bastia, è 2 % pà i cumuni chì l’INSEE conta da pirifiria d’ugni cità. Aiacciu è i so circondi cuntaiani 106488 abitanti di ghjinnaghju llu 2016, mentri chì Bastia è i so circondi ni cuntaiani 97583. Si rimarcarà chì Lucciana si passa à Calvi, cù una crescita di 3,6 % in cinqui anni, mentri chì Calvi hà persu 0,6 % d’abitanti in u stessu tempu.
Sur le même sujet
